Author: Bjarki

Í gær mánudag, fór ég með Grettir SH 104 frá Stykkishólmi til netaveiða í Breiðafirði. Verkefni dagsins var að draga 6 trossur og leggja svo fjórar til viðbótar. Afli dagsins var nálægt 5 tonnum en hefði mátt vera meiri. Þetta er í fyrsta skiptið sem ég hef unnið um borð í skipi frá Stykkishólmi og líklegast annað skipið sem ég hef unnið á sem ekki er skráð í Grundarfirði. Ég fór kíkti svo í kaffi til Stormsins og höfðum við feðgarnir ýmislegt að spjalla um og var ég því seint heima í gærkvöldi. Í dag setti ég svo upp spjallborð á síðuna mína og vona að þið verðið öll dugleg að skrifa eitthvað á spjallborðið. Spjallborðið er þannig uppsett að fólk þarf að skrá sig inn til að geta skrifað eitthvað þar, en bannað er að vera með mikil leiðindi. Til að komast inn á spjallborðið þá er tengill vinstramegin á síðunni og einnig í tenglasafninu efst á síðunni.

Í dag kom áhöfnin saman til fundar um stöðu mála varðandi Grundfirðing. Ljóst er að um tveggja mánaðar stopp er að ræða þar sem skipa þarf um stýrisbúnað, skrúfubúnað og gírinn verður yfirfarinn. Áhöfnin verður á kauptryggingu þann tíma sem við erum ekki að vinna hjá öðrum. Ljóst er að kauptrygging dugar fæstum til að framfleyta sér og borga heimilisreikninga á sama tíma og munu menn því væntanlega reyna koma sér í eitthver afleysingarstörf. Ég er nú búinn að fá einn netaróður með Grettir SH á mánudaginn og kannski eitthverja daga kringum næstu helgi. Annars ætla ég að fara sem farþegi með Garpnum í fyrramálið og mun myndavélin vera þar með í för. Hver veit nema maður skelli svo öllu upp í kæruleysi og fari bara til FarFarAway þar sem maður getur lifað eins og kóngur á kauptryggingunni.

Þá er maður búinn að fá smá fréttir af gangi mála með Grundfirðing, en í morgun kom Sóley SH-124 í land og eftir löndun drógu þeir Grundfirðing inn í Stykkishólm þar sem hann bíður slipptöku.  Áður en skipið var dregið inn í Hólm kafaði Sumarliði til að kanna skemmdir á skipinu og eftir hans lýsingum telja svartsýnustu menn að viðgerð gæti tekið allt að tvo mánuði.  Það á að reyna taka skipið upp í slippinn á miðnætti en óvíst að það gangi sökum veðurs í hinum Stormasama Stykkishólmi.  Samkvæmt þessum fréttum tel ég það víst að komið sé svar við spurningu sem ég varpaði fram þann 7.2.2004 „En annars er það bara hin besta tilbreyting að skipta um veiðafæri auk þess sem það gefur möguleika á meiri launum. Þ.e. auðvitað ef kallinn klúðrar þessu ekki, hver veit?“
En annars erum við að fara núna nokkrir úr áhöfninni inn í Ólafsvík til að taka á móti Sæfara ÁR (ex Fanney SH-24 & ex Grundfirðingur SH-24), sem dró upp nokkrar netatrossur fyrir okkur í dag, og munum við koma netunum, færu, drekum og baujum í kör á bryggjunni.  Aðrir bátar sem drógu upp trossur fyrir okkur í dag munu vera Sjöfn EA, Saxhamar SH og Haukabeg SH-20 og eiga áhafnir þessara báta þakkir skyldar fyrir það. Einnig eiga Kibbi Rabba og áhöfnin á Sæþór EA þakkir skyldar fyrir snögg viðbrögð í morgun.

Í dag var ákveðið að fara snemma á sjóinn (kl. 3) til að geta verið búnir að draga áður en veðrið mundi versna seinnipart dags, en stundum bara fara hlutirnir ekki eins og menn ætla. Þegar við vorum rétt að fara frá stórubryggjunni skall á hið versta veður og rétt sluppum við frá því að bakka á Sæþór EA sem lá einnig við stórubryggjuna, en í staðinn tók vindurinn völdin og lentum við á grjótgarðinum við enda stórubryggjunnar og skemmdum stýrið á bátnum sem varð svo til að drapst á aðalvélinni. Var ankeri strax látið síga þar sem bátinn rak stjórnlaust frá stórubryggjunni út á fjörð. Þar sem þarna er aðalega drullubotn náði ankerið ekki festu og rak okkur hratt í átt að þorskeldinu. Kibbi vaktmaður var snöggur að ræsa áhöfnina á Sæþóri EA sem svo voru snöggir að koma okkur til aðstoðar og draga Grundfirðing að bryggju. Ekki er vitað hve mikið tjónið á stýri, skrú eða skrokk eru. Þetta er ekki skemmtileg lífsreynsla en fyrir öllu er að allir komumst við í höfn heilir. Svo núna veit maður ekki hvað næsta skref er en það verður líklegast leitað eitthvera leiða til að ná netunum okkar úr sjó og laga það sem laga þarf. Líklegast þarf Grundfirðingur að fara í slipp og er ómögulegt að gera sér grein fyrir hvað það tekur langan tíma að gera við skipið en vonandi sem stystan tíma. Þetta er auðvitað skelfilegt að lenda í þessu yfir hábjargræðistímann og líklega verður launatap áhafnarinnar töluvert af þessum sökum.

Komum í land í morgun kl. 06:00 úr síðasta línuróðrinum í bili. Núna erum við að skipta yfir á þorskanet, sem er mjög svo skemmtilegt veiðafæri, auk þess sem við verðum í dagróðrum. All flestir áhafnarmeðlimir eru mjög svo spenntir fyrir þessari breytingu og er mikil tilhlökkun í mannskapnum, fyrir utan einn en í honum er smá skrekkur (Shrek) yfir þessu öllu saman. Einn ónefndur var orðinn svo spenntur í síðasta túr að hugur hans var búinn að leggja netin og var hann næstum byrjaður að draga þau líka. Eins og í fyrra þá verðum við með einn Ólsara, hann Danna, og virðist vera skapast eitthver hefð fyrir að hafa eins slíkan á netunum. En annars er það bara hin besta tilbreyting að skipta um veiðafæri auk þess sem það gefur möguleika á meiri launum. Þ.e. auðvitað ef kallinn klúðrar þessu ekki, hver veit?

Loksins tóks Microsoft að senda frá sér almennilegt forrit.  „Microsoft´s AntiSpyware tool“ en þetta forrit á áð fjarlægja spæjaraforrit og önnur skaðleg forrit úr tölvum og er það svo öflugt að það fjarlægir einnig hið marggallaða forrit Internet Explorer.  Ég mæli með að fólk setji upp „FireFox“, „Mozilla“ eða „Opera“ vafra á tölvunni sinni áður en þetta snilldar forrit er keyrt á tölvunni ykkar.  Lesið nánar frétt af vef.