Sæl öll, núna er ég víst kominn heim og farinn aftur!!! Kom til landsins á mánudaginn og er búinn að vera í Reykjavík að hjálpa mömmu og Friðjóni að flytja smá, en þau eru búinn að kaupa sér nýja íbúð og selja þá gömlu. Þau munu samt ekki flytja alveg fyrr en síðar í mánuðnum. Ég hins vegar kom til Grundarfjarðar í nótt um kl. 2 og fer/fór aftur fljótlega eftir það til Reykjavíkur aftur. Ég mun svo á morgun fljúga austur á Egilsstaði og taka rútu til Eskifjarðar þar sem ég mun fara á sjóinn með Bjössa á Tjaldi SH-270. Tjaldurinn sem er gerður út af Brim er á grálúðunetum. Ég mun svo koma í land aftur fimmtudaginn 21.apríl og kem til Grundarfjarðar fljótlega eftir það, þar sem vonandi verður farið á sjóinn á Grundfirðingi fljótlega eftir það. Eftir þennan túr með Tjaldinum verð ég á árinu búinn að vinna hjá öllum helstu útgerðarfyrirtækjum landsins þ.e. Soffaníasi Cecilssyni, Guðmundi Runólfssyni (3 dagar), Samherja (Sæból) (5dagar), Brim (7dagar) og Sæfelli (5 dagar).
Auk þessa að ferðast til 4 landa og fljúga tæplega 10.000km í 8 flugferðum. Öll ferðasagan og myndir munu svo væntanlega koma inn eftir að ég kem heim næst, en auðvitað lenti maður í smá ævintýrum, ýmist vegna hversu utan við mig ég get verið eða með ýmislega öðruvísi hluti í öðruvísi löndum.
22.3.2005
Þá er maður að fara leggja í hann til Budapest en þaðan mun ég svo fljúga til Rúmeníu. Það er ekki vitað hvenær ég verð í netsambandi næst og því óvíst hvenær hér verður uppfært næst.
21.3.2005
Í gær 20 mars átti Haraldur Róbert Magnússon afmæli!!!!!b
Í morgun lagði ég af stað til FarFarAway. Fyrsti viðkomustaðurinn á leiðinni er Kaupmannahöfn, en þangað kom ég kl. 12 að Dönskum tíma í dag. Ég byrjaði á að sækja farmiðanna fyrir seinni hluta ferðarinnar á flugvellinum í Kaupmannahöfn, en eftir að því var lokið ætlaði ég að skilja töskurnar eftir í geymsluhólfum á flugvellinum. Þar sem eitthverjar framkvæmdir eru í gangi á Kastrup þá var ekki hægt að nota geymsluhólfin þar og fór ég því með allar töskurnar á aðaljárnbrautastöðina í geymsluhólf þar. Síðan var tímanum eytt aðeins í borginni þar til kl. 15:30 að ég hitti elskulegu stjúpsystur mína (Helgu Stínu) á ráðhústorginu en þar höfðum við mælt okkur mót. Við Helga fórum svo á kaffihús þar sem ég fékk mér Tuborg en hún kaffi. Svo var farin smá skoðunarferð um, strikið, nýhöfnina, framhjá könungshöllinni en þar sást óperuhúsið einnig. Svo fórum við heim til Helgu þar sem ég er að skrifa þennan texta. Helga fór í söngtíma en þegar hún kemur til baka þá munum við fara eitthvað út að borða.
19.3.2005
Það er víst ekki öll vitleysan eins, en eins og er þá hef ég ekki en fengið leyfi frá yfirvöldum í Moldavíu til að heimsækja landið og er staðan því ekki nógu góð. Ég hef þó nokkra valkosti í stöðunni og eru þeir: a) Held mínu striki og lendi í Moldavíu á þriðjudagskvöld og vona að pappírarnir verði klári en annars flytjast óviljugur í vinnubúðir í síberíu. b) Hringja í Sæma Rokk og biðja hann um að redda málunum, en hann er reyndar upptekinn af Bobby Fisher eins og er. c) Hringja í Steingrím J. og ganga í flokkinn hans og vonast til að kommunistastjórnin í Moldavíu gefi mér landvistarleyfi. d) Ég breyti ferðaáætluninni og hitti Tatiönu í Rúmeníu.
Ef ég vel kost D þá get ég notað tækifærið og heimsótt Dracula í Transilvaníu en Transilvanía er jú í Rúmeníu.
17.3.2005 Poul Jepson (Palli danski) á afmæli í dag!!! Til hamingju með afmælið Palli!!!
Þá er maður víst orðin skipamella og síðast á sjó hjá einu stærsta útgerðarfyrritæki Íslands, Samherja. Mig hefur nú lengi langað til að prófa fara á sjó með þeim bræðrum Jóa og Óla Sigga og því var nú gaman að fá tækifæri til að róa á Þorvarði Lárussyni. Jói er reyndar ekki þar um borð því hann er skipstjóri á erlendum togara og því er Óli Siggi skipstjóri. Ég fór þarna tvær veiðiferðir og var sú fyrri aðeins 42klst og seinni 3 dagar. Í báðum túrum var fullfermi. Það kom mér svolítið á óvart hvað vinnuaðstaða er góð þarna um borð og fer vel með menn. Einnig var mannskapurinn allur mjög skemmtilegur og góður mórall um borð. Í fyrri túrnum var mjög mikið að gera og unnið allar vaktir og ekki laust við að maður hafi verið svolítið þreyttur eftir túrinn. Seinni túrinn var heldur rólegri og fengust því stundum smá pásur. Þess má nú geta að Þorvarður Lárusson SH var aflahæsti togbáturinn á Íslandi í febrúar og vonandi ná þeir því aftur í mars. Ég tók eitthvað af myndum þarna um borð sem munu birtast hérna fljótlega. Af áhöfninni á Þorvarði voru aðeins tveir menn sem ég hef róið með áður, þeir Illugi (frá Naustum) og Hlynur (aður kallaður Gubbi). Hlynur náði ekki að standa undir Gubba nafninu því hann ældi ekkert en þess í stað tók ég eftir hvað hann er orðinn svakalega snöggur í aðgerð og lest, enda var hann í uppeldisbúðum hjá mér á Grundfirðingi. Matsveinninn, Sævar (strandamaður) fær topp einkunn hjá mér fyrir góðan mat, hvort sem það var fiskur eða kjöt og einnig fyrir hvað hann er ótrúlega snöggur í aðgerð. Skipstjórinn var með eindæmum rólegur, stresslaus og ávalt með góðan húmor. Af öðrum góðum mönnum þarna voru Einar (stýrimaður), Kristófer (vélstjóri), Stebbi (vélavörður), Illugi (netamaður), Reynir Freyr, Hlynur (skipstjórasonur) og auðvitað ég.
9.3.2005
Ekki fór svo að ég færi nema einn dag með Grettir og hef ég því aðeins róið 5 daga með þeim. Ég fór hins vegar á laugardagsmorguninn með Helga SH-135 til togveiða. Túrinn tók 72klst og var aflinn rétt rúmlega 2 gámar. Þetta vakti upp margar gamlar minningar að fara þarna um borð því þarna var margt líkt með Runólfi SH nema auðvitað allt minna. Þarna voru líka nokkrir fyrrverandi vinnufélagar, Addi skipstjóri, Hemmi vélavörður og Gummi Jóns. Þarna vantaði þó menn til að fullkomna samlíkinguna við Runólf. Mér sýndist Addi vera svipaður skipstjóri og Runni frændi hans, þ.e. afskaplega rólegur og laus við allt stress. Hemmi var þarna vélavörður en maður var vanur því að hann væri vaktformaður og áttaði ég mig ekki alveg á því fyrr en í miðjum túr að Hemmi hafði ekkert með dekkstjórn að gera lengur. Í þeirri stöðu var nú reyndar annar góður maður, Gummi Jóns en staðan kallast víst netamaður á þessu skipi. Þarna vantaði þó Vigga Runna sem var í frí en örugglega hefði verið gaman að hann þarna. Aðrir menn þarna um borð voru, Óli Fjalar (stýrimaður), Finni (matsveinn), Stebbi húsvörður (vélstjóri), Ásmundur Hólmari (háseti) og Villi bakari úr Hólminum (háseti). Af þessum mönnum hef ég áður verið á sjó með Óla Fjalari þegar hann leysti af einn túr sem stýrimaður á Grundfirðing, Villa þegar hann kom með sem háseti á Grundfirðing í Janúar og Ásmundi þegar hann kom eitthverja túra á Hring SH-535 þegar ég var að vinna þar.. Við þurftum víst að leita til hafnar í Grundarfirði í miðjum túr, því það brotnaði skórinn undan öðrum hleranum, og varð að skipta þeim út fyrir varahlerapar sem var í landi. Skipið er nú ekki nógu stórt til að geyma aukahlera um borð og er einnig aðeins eitt troll þarna. Á heimleiðinni var trollið allt yfirfarið og fékk ég þá að rifja aðeins upp bættningarkunnáttuna.