Category: bjarki

Þann 20. s.l. eignuðust Tommi og Rúna lítinn dreng og óska ég þeim innilega til hamingju með það.  Tommi er víst að springa úr stolti, en síðar mun hann væntanlega mæta dauðþreyttur í vinnuna eftir andvöku nætur heima hjá sér.

Svo fór víst að Selma greyið komst ekki upp úr undankeppni Eurovision og fannst mér það bara nokkuð fyndið.  En í staðinn þá varð Moldavía í 6. sæti og gáfu Íslendingar þeim víst 8 stig.  Moldavía fékk 12 stig frá tveimur þjóðum og voru það nágrannalöndin Úkraína og Rúmenía.  Svíjarnir enduðu í 19. sæti og er það langt fyrir neðan þeirra meðaltal í keppninni.

Samkvæmt frétt á mbl.is í dag þá „Fulltrúar Moldavíu fengu bestar viðtökur á lokaæfingunni“  Svo ég spái að Ísland og Moldavía komist áfram í aðalkeppnina.  Fulltrúar Moldavíu syngja um ömmu gömlu sem lemur trommuna allan daginn. Reyndar voru strákarnir í Moldavísku hljómsveitinni að halda fyrir mig kveðjutónleika kvöldið áður en ég fór frá Moldavíu síðast og þá mættu eitthverjir tugir þúsunda af fólki í miðborgina í Chisinau. Svo spái ég því að Svíþjóð nái ekki á topp 10 í ár en ég held að þeir séu vanir að eiga betri lög en núna.

Kom í land í gær úr veiðiferð sem verður líklegast ógleymd um langan tíma. Strax fyrsta morguninn varð ljóst að afleysingar maður sem við höfðum fengið var gjörsamlega ónothæfur, sem er ekki gott mál á skipi sem er mannað færri mönnum en gengur og gerist í línubátaflotanum. Það var nú samt mesta furða hvað strákarnir á morgunvaktinni voru hressir þegar þeir komu í hádegismat og gerðu mikið grín af frammistöðu drengsins sem fæddur var 1979. Næstu nótt flæktust fuglafælurnar í línunni á lögninni og slitnaði línan og varð úr nokkuð góð flækja sem kláraðist ekki að vinna fyrr en á landleiðinni og svo um kvöldið þegar komið var að slitinu og við vorum að taka niður slitinn rekka þá datt kokkurinn gegnum mannop á lestarlúgunni. Það vildi til happs að kokkurinn er hraustari, betur byggður og meiri karlmaður en almennt gengur og gerist, og því urðu aðeins minniháttar meiðsl á honum. Aðrir sem voru á dekkinu fengu því áfallahjálp en kokkurinn kaffi og súkkulaði sem hann felur fyrir áhöfninni. Svo loka daginn þá bæði slitnaði línan og þá bilaði stjórnborðs lensudæla á millidekkinu og þurfti því að taka dælu sem var bakborðs megin og setja í hennar stað og töfðumst við nokkuð við þetta og vorum það seint í landi að örugglega fór að sjóða á ónefndum yfirmanni vinnslunnar í landi.

Lenti í smá vandræðum með eitthverja Argentíska hakkara sem stálu síðunni minni. Var nú reyndar fljótur að laga forsíðuna en lenti í smá vandræðum með myndaalbúmið mitt og síðuna hennar Viktoríu frænku. Ef þið finnið eitthvað sem ekki virkar á síðunni minni þá endilega láta mig vita.

Þetta er búinn að vera áhugaverður dagur. Ég kom í land í morgun og ég og Palli vinur minn fórum í Stykkishólm að sinna ýmsum málum, m.a. fékk Palli skipsstjórnarréttindi á 30brt. og minni báta og því heldur hann því fram að hann sé núna skipstjórinn á bátnum okkar. Hann má svo sem trúa því en þá er ég bara útgerðarmaðurinn. (báturinn er 5,95cm og ekki réttindaskyldur). Svo vorum við Palli að vinna í bátnum í kvöld þegar við fengum Dadda og Jóa í heimsókn sem endaði með ferð á Kaffi 59. Það var margt skemmtilegt sem gerðist þar og náðum við að fá Óla Ólason til að stein drepast við borðið og svo gerðist sú skemmtilega tilviljun að í Grundarfirði var bæði SÓL & LOGN

Þá er maður loksins heima, en er reyndar að fara á sjóinn í dag. Um daginn þegar ég var á Tjaldinum með Bjössa þá komum við í land á Akureyri, á sumardaginn fyrsta og flugum til Reykjavíkur. Þegar til Reykjavíkur kom fór ég að hjálpa móður minni að flytja í annað hús og svo fór ég með Óla bróðir heim til Grundarfjarðar. Daginn eftir mætti ég í vinnu kl. 8 um morguninn og fór svo á sjóinn um kvöldið. Komum svo aftur í land á þriðjudaginn og stoppuðum í 12 klst. Fórum svo aftur á sjóinn á þriðjudagskvöldið og komum á föstudagsmorgni (gær) í land, en þá fórum við Bjarni vélstjóri til Reykjavíkur og komum svo í gærkvöldi heim aftur. Þannig að ég er búinn að vera mjög lítið heima síðan 20 apríl s.l. Af þeim sökum hefur lítið verið uppfært á síðunni minni en ég hef samt aðeins verið að reyna koma inn nýjum myndum í nýja myndaalbúmið mitt sem má nálgast í valmyndinni vinstra megin á síðunni.